2026-жылдын 24-июлунда Кыргыз Республикасынын Президенти тарабынан турак жайларды өрттөн жана табигый кырсыктардан милдеттүү камсыздандыруу тутумун өркүндөтүүгө багытталган Кыргыз Республикасынын №122 «Кыргыз Республикасынын айрым мыйзамдарына (Кыргыз Республикасынын Жарандык кодексине, Кыргыз Республикасынын «Турак жайларды өрттөн жана табигый кырсыктардан милдеттүү камсыздандыруу жөнүндө» Мыйзамына) өзгөртүүлөрдү киргизүү жөнүндө» Мыйзамына кол коюлду.
Мыйзамга ылайык, турак жайларды өрттөн жана табигый кырсыктардан милдеттүү камсыздандыруу боюнча камсыздандыруу пулу түзүлөт. Камсыздандыруу пулун түзүү турак жайларды милдеттүү камсыздандыруу тутумунун финансылык туруктуулугун жогорулатууга, камсыздандыруу уюмдарынын ортосунда камсыздандыруу тобокелдиктерин натыйжалуу бөлүштүрүүгө жана камсыздандыруу учурлары келип чыккан учурда жарандарга камсыздандыруу төлөмдөрүнүн өз убагында жүргүзүлүшүн камсыз кылууга мүмкүндүк берет.
Мыйзамды ишке ашыруу камсыздандыруу рыногунун өнүгүшүнө, ошондой эле калктын мүлктүк кызыкчылыктарын коргоо механизмдерин чыңдоого өбөлгө түзөт.
