Кыргыз Республикасынын Экономика жана коммерция министрлигине караштуу Финансы рыногун жөнгө салуу жана көзөмөлдөө кызматы (мындан ары – Финкөзөмөл) Интернет тармагына мониторинг жүргүзүүнүн жүрүшүндө ар кандай интернет – платформаларда жана социалдык тармактарда тиешелүү уруксатсыз лотереяларды уюштуруу жана өткөрүү учурларын аныктады. Мониторинг жарандарды мыйзамсыз финансылык активдүүлүктөн коргоо үчүн туруктуу негизде жүргүзүлөт.
“Барсбек Батыралиев” коомдук каналында (Ссылка: https://www.youtube.com/@barsbekbatraliev3) катышуунун шарттарын жана байге фондун кеңири баяндаган үч видеоролик жарыяланган. Уюштуруучулар катышуу үчүн 2000 сом же 2000 рубль өлчөмүндөгү акча каражатын
0707 868 385 номуруна которууну талап кылышууда.
Жарыяланган маалыматка ылайык, байге фондуна төмөнкүлөр кирет:
• LEXUS, Toyota Camry жана BMW X5 автоунаалары;
• Жалпы суммасы 1 000 000 сом акчалай сыйлыктар (100 катышуучуга 6 000 сом, 100 катышуучуга 4 000 сом);
• iPhone маркадагы 20 телефон.
Жеңүүчүлөрдү аныктоо боюнча акыркы белек тартуулоо маалымдалган маалыматка ылайык 2025-жылдын 21 – октябрында пландалган, бирок уюштуруучулар өткөрүү күнүн өзгөртүшү мүмкүн.
Бул каналдын ишмердүүлүгүнүн мыйзамдуулугу онлайн платформаларда жана социалдык тармактарда кызуу талкууланууда.
Финкөзөмөл уюштуруучунун ыйгарым укуктуу мамлекеттик органдын уруксаты жок экенин, лотереяны уруксатсыз өткөрүү мыйзамсыз экенин эскертет. Ачылган мыйзамсыз иш боюнча материалдар аталган уюштуруучуларга чара көрүү үчүн Кыргыз Республикасынын Ички иштер министрлигине жөнөтүлдү.
Финкөзөмөл жарандарды сак болууга, мындай лотереяларга катышуудан алыс болууга жана ачыкка чыкпаган окуялар тууралуу https://fsa.gov.kg/ расмий сайты же төмөнкү даректер аркылуу билдирүүгө чакырат:
Банктык эмес финансы уюмдарын жөнгө салуу департаменти:
Тел.: 66-45-13; 96-13-04; 66-29-85
Финкөзөмөл эскертет: мыйзамсыз лотереяларга катышуу каржылык жоготууларга алып келиши мүмкүн. Онлайн лотереялардын мыйзамдуулугун текшерип, акчаңызды коргоңуз.
