Мыйзам долбоорунун максаты жана милдеттери онлайн-лотереяларды, санариптик ойнотууларды жана бинардык опциондорду укуктук жөнгө салууну белгилөө, бул чөйрөдөгү мамлекеттик көзөмөлдү күчөтүү, алдамчылык тобокелдиктерин азайтуу, жарандардын укуктарын коргоо, кылмыштуу кирешелерди адалдоого жана терроризмди каржылоого багытталган аталган инструменттерди пайдаланууга жол бербөө болуп саналат.
Мыйзам долбоорунда бинардык опциондор менен байланышкан ишмердүүлүккө так укуктук тыюу салууну белгилөө сунушталат. Тактап айтканда, аларды уюштурууга жана өткөрүүгө, жарнамалоого, жайылтууга жана илгерилетүүгө, Кыргыз Республикасынын жарандарынан жана резидентеринен акча каражаттарын жана виртуалдык активдерди кабыл алууга, ошондой эле жарандарды бинардык опциондорго катышууга тартууга багытталган ортомчулук ишмердүүлүккө тыюу салуу каралат.
Мыйзам долбоору менен Кыргыз Республикасынын Кылмыш-жаза кодексине, “Кыргыз Республикасындагы кумар оюндары жөнүндө” Кыргыз Республикасынын Мыйзамына жана “Лотереялар жөнүндө” Кыргыз Республикасынын Мыйзамына өзгөртүүлөрдү киргизүү каралган. Өзгөртүүлөр бинардык опциондор түрүндөгү кумар оюндарын уюштурууну жана өткөрүүнү тыюу салынган ишмердүүлүккө түздөн-түз киргизүү аркылуу мыйзамсыз кумар оюндары үчүн кылмыш жоопкерчилигин тактайт, ошондой эле тиешелүү уруксаты жок мыйзамсыз лотерея уюштургандыгы жана өткөргөндүгү үчүн, анын ичинде маалыматтык-коммуникациялык технологияларды пайдалануу жана квалификациялоочу белгилер менен жорук жасалган учурлар үчүн өзүнчө кылмыш жоопкерчилиги киргизилет.
