2026-жылдын 4-ноябрында Кыргыз Республикасынын Экономика жана коммерция министрлигине караштуу Финансы рыногун жөнгө салуу жана көзөмөлдөө кызматынын төрагасы Кайрат Маматов Эл аралык ишкердик кеңешинин (ЭИК) өкүлдөрү менен жолугушуу өткөрдү.
Жолугушуунун жүрүшүндө Финкөзөмөлдүн төрагасы жана түзүмдүк бөлүмдөрдүн жетекчилери ведомствонун ишинин негизги багыттары, банктык эмес финансылык рынокту өнүктүрүүнүн жана жөнгө салуунун артыкчылыктуу багыттары жөнүндө маалымат беришти, ошондой эле катышуучуларды финансылык секторду жөнгө салуунун эл аралык тажрыйбасы менен тааныштырышты.
Өзгөчө көңүл баалуу кагаздар жана камсыздандыруу рынокторун өнүктүрүү, финансылык кызмат көрсөтүүлөрдү санариптештирүү, аудитордук ишмердүүлүк, ошондой эле инвестициялык жана венчурдук фонддорду өнүктүрүү перспективаларына бурулду.
Жолугушуунун жыйынтыгында тараптар мамлекеттик-жеке өнөктөштүктүн алкагындагы диалогду мындан ары чыңдоого, конструктивдүү кызматташтыкты өнүктүрүүгө жана Кыргыз Республикасынын банктык эмес финансылык рыногунун ачыктыгын, туруктуулугун жана инвестициялык жагымдуулугун жогорулатууга багытталган биргелешкен чечимдерди иштеп чыгууга кызыкдар экендиктерин билдиришти.
Финкөзөмөл бизнес-коомчулук менен үзгүлтүксүз өз ара аракеттенүүнү жөнгө салуу механизмдерин өркүндөтүүнүн, инвесторлордун жана финансылык кызмат көрсөтүүлөрдү керектөөчүлөрдүн укуктарын коргоонун, ошондой эле өлкөнүн финансылык рыногун туруктуу өнүктүрүү үчүн шарттарды түзүүнүн маанилүү куралы катары белгилейт.
