Кыргыз Республикасынын виртуалдык активдердин жүгүртүү чөйрөсүндөгү мыйзам талаптарынын бузулушу аныкталгандыгына байланыштуу Кыргыз Республикасынын Экономика жана коммерция министрлигине караштуу Финансы рыногун жөнгө салуу жана көзөмөлдөө кызматы (Финкөзөмөл) виртуалдык активдерди алмаштыруу операторунун жана виртуалдык активдердин тооругунун оператору (криптобиржа) ишин жүзөгө ашырууга мурда берилген лицензияларды кайтарып алды.
Кыргыз Республикасынын «Виртуалдык активдер жөнүндө» Мыйзамынын 31-беренесинин 2-бөлүгүнүн 3, 4 жана 6-пункттарына, ошондой эле 32-беренесинин 4-бөлүгүнүн 1, 3 жана 5-пункттарына ылайык, Финкөзөмөлдүн буйруктары менен төмөнкү юридикалык жактардын лицензиялары кайтарып алынды:
- «Гринекс» ЖЧК – ВА сериясындагы № 0183 лицензия, 2025-жылдын 25-апрелиндеги № 161 каттоо номери;
- «Онли Файненс» ЖАК – ВА сериясындагы № 0156 лицензия, 2025-жылдын 17-январындагы № 11 каттоо номери.
Финкөзөмөл виртуалдык активдер чөйрөсүндөгү кызмат көрсөтүүчүлөргө Кыргыз Республикасынын виртуалдык активдер чөйрөсүндөгү ишти жөнгө салган мыйзамдардын талаптарын так сактоо, ошондой эле мыйзамдарда белгиленген милдеттерди ак ниеттүү аткаруу зарылдыгын эскертет.
Финкөзөмөл виртуалдык активдердин жүгүртүү чөйрөсүндөгү мыйзам талаптарынын сакталышын көзөмөлдөөнү мындан ары да улантып, мыйзам бузууларга жол берген субъекттерге карата мыйзамда каралган чараларды көрөт. Бул мыйзамдуулукту камсыз кылууга, рыноктун ачыктыгын жогорулатууга, керектөөчүлөрдүн укуктарын коргоого жана Кыргыз Республикасынын финансы секторунун туруктуу өнүгүшүнө багытталган.
