Кыргыз Республикасынын «Камсыздандыруу жана камсыздандыруу иши жөнүндө» мыйзамынын 82-беренесинин 3-бөлүгүн ишке ашыруу максатында жана Кыргыз Республикасынын «Кыргыз Республикасынын Министрлер Кабинети жөнүндө» конституциялык Мыйзамынын 13 жана 17-беренелерине ылайык 2025-жылдын 5-ноябрындагы № 719 «Камсыздандыруу (кайра камсыздандыруу) уюмдарынын финансылык туруктуулугун камсыз кылуу боюнча ченемдик укуктук актыларды бекитүү жөнүндө» токтому кабыл алынды.
Кыргыз Республикасынын Министрлер Кабинети тарабынан камсыздандыруу секторунун финансылык туруктуулугун жана ачык-айкындуулугун жогорулатууга, камсыздандыруучулардын кызыкчылыктарын коргоону күчөтүүгө жана өлкөдө атаандаштыкка жөндөмдүү камсыздандыруу рыногун өнүктүрүүгө багытталган төмөнкү ченемдик актылар бекитилди:
1) Камсыздандыруу уюмдары тарабынан камсыздандыруу (техникалык) резервдерин жайгаштыруу эрежелери;
2) Камсыздандыруу (кайра камсыздандыруу) уюму үчүн пруденциалдык ченемдер жөнүндө нускама;
3) Кыргыз Республикасынын камсыздандыруу уюмдарынын камсыздандыруу (техникалык) резервдерине чегерүүлөрдүн ченемдерин эсептөө тартиби жөнүндө жобо.
Мындан тышкары, бул токтом менен камсыздандыруу жана кайра камсыздандыруу уюмдарынын, ошондой эле камсыздандыруу брокерлеринин уставдык капиталынын минималдуу өлчөмүнө карата талаптар белгиленген:
150 млн сом – ыктыярдуу жана милдеттүү камсыздандыруунун жана кайра камсыздандыруунун түрлөрүн, анын ичинде жүктөлгөн, аннуитеттик жана исламдык (такафул) камсыздандырууну жүзөгө ашыруучу камсыздандыруу (кайра камсыздандыруу) уюмдары үчүн;
300 млн сом – ишмердүүлүгүн кайра камсыздандыруу боюнча гана жүзөгө ашыруучу уюмдар үчүн;
100 млн сом – эркин экономикалык зоналарда кайра камсыздандыруу боюнча гана иштеген уюмдар үчүн;
1 млн сом – камсыздандыруу (кайра камсыздандыруу) брокерлери үчүн.
Ошол эле учурда ченемдик укуктук актылар аларды системалаштыруу жана заманбап талаптарга ылайык келтирүү максатында, токтом менен мурда кабыл алынган бир катар Өкмөттүн чечимдери күчүн жоготту деп табылды.
Токтом расмий жарыяланган күндөн тартып 10 күндөн кийин күчүнө кирет.
