«Камсыздандыруу рыногунун катышуучуларына жана камсыздандыруу (кайра камсыздандыруу) уюмдарын башкаруу боюнча убактылуу администрацияга коюлуучу квалификациялык талаптарды бекитүү жөнүндө» Кыргыз Республикасынын Министрлер Кабинети тарабынан 2025-жылдын 9-октябрында № 650 токтом кабыл алынды

Кыргыз Республикасынын Министрлер Кабинети 2025-жылдын
9-октябрында № 650 «Камсыздандыруу рыногунун катышуучуларына жана камсыздандыруу (кайра камсыздандыруу) уюмдарын башкаруу боюнча убактылуу администрацияга коюлуучу квалификациялык талаптарды бекитүү жөнүндө» токтомду кабыл алды.

Бул токтом «Камсыздандыруу жана камсыздандыруу иши жөнүндө» Кыргыз Республикасынын Мыйзамынын 82-беренесинин 3-бөлүгүн ишке ашыруу максатында, ошондой эле «Кыргыз Республикасынын Министрлер Кабинети жөнүндө» конституциялык Мыйзамдын 13 жана 17-беренелерине ылайык кабыл алынды.

Токтом менен төмөнкү жоболор бекитилди:

1. Камсыздандыруу (кайра камсыздандыруу) уюмунун кызмат адамдарына коюлуучу квалификациялык талаптар жөнүндө жобо – камсыздандыруу уюмдарынын жетекчилик жана негизги кызмат адамдарынын билим деңгээлине, кесиптик тажрыйбасына, сертификаттарына жана жоопкерчиликтерине коюлуучу талаптарды аныктайт.

2. Кыргыз Республикасындагы камсыздандыруу брокерлеринин иши жөнүндө жобо – брокердик иштин лицензияланышын, маалыматты ачыктоо милдетин, кардарлардын кызыкчылыктарын коргоо жана кызыкчылыктардын кагылышын болтурбоо механизмдерин жөнгө салат.

3. Кыргыз Республикасындагы актуардык иш жөнүндө жобо – актуарийлердин кесиптик деңгээлин, көз карандысыздыгын, эсептөөлөрдүн ыкмаларын жана актуардык корутундуларды жөнгө салуу органдарына берүү тартибин белгилейт.

4. Камсыздандыруу (кайра камсыздандыруу) уюмдарын башкаруу боюнча убактылуу администрация жөнүндө жобо – убактылуу администрацияны дайындоо тартибин, ыйгарым укуктарын, камсыздандыруу уюмунун төлөм жөндөмдүүлүгүн калыбына келтирүү чараларын жана жөнгө салуучу орган менен өз ара аракеттенүү жолдорун аныктайт.

5. Баалоочуларга, камсыздандыруу сюрвейерлерине жана аджастерлерге коюлуучу квалификациялык талаптар жөнүндө жобо – бул адистердин кесиптик даярдыгына, аттестациядан өтүү жана ишмердүүлүгүн көзөмөлдөө тартибине байланыштуу талаптарды белгилейт.

Нормативдик базаны жаңылоо максатында:

Токтом менен мурда кабыл алынган бир катар Өкмөттүн чечимдери күчүн жоготту деп табылды. Анын ичинде:

2011-жылдын 11-ноябрындагы № 712 токтом (убактылуу администрация жөнүндө);

2012-жылдын 1-августундагы № 525 токтом (кызмат адамдарына коюлуучу талаптар жөнүндө);

ошондой эле 2014–2024-жылдар аралыгындагы бир катар токтомдор (№ 485, № 159, № 239, № 293, № 321, № 456, № 477 жана № 305).

Токтом расмий жарыяланган күндөн тартып он күн өткөндөн кийин күчүнө кирет.

Тиркеме: 2025-жылдын 9-октябрында № 650 КРКМ токтому