Кыргыз Республикасынын Экономика жана коммерция министрлигине караштуу Финансы рыногун жөнгө салуу жана көзөмөлдөө кызматы (мындан ары – Финнадзор) төмөнкүлөрдү билдирет:
Акыркы убакта Финнадзорго текшерилип жаткан субъекттерден укук коргоо органдары менен кызматташкан айрым аудитордук уюмдардын жана аудиторлордун аракеттерине байланыштуу кайрылуулар жана даттануулар көбөйдү.
Бул жагдайга байланыштуу Финнадзор аудитордук уюмдардын жана аудиторлордун Кыргыз Республикасынын аудитордук ишмердүүлүк жөнүндөгү мыйзамдарын, өзгөчө Эл аралык аудит стандарттарын так сактоо зарылдыгына өзгөчө көңүл бурат.
Аудитордук тапшырмаларды аткарууда, анын ичинде укук коргоо органдарынын суроо-талабы боюнча отчетторду, корутундуларды жана башка документтерди берүүдө, аудиторлор өздөрүнүн кесиптик ыйгарым укуктарынын чегинде гана иш алып барууга милдеттүү, “Финансылык маалыматка карата макулдашылган жол-жоболорду аткаруу тапшырмалары” МССУ 4400 жана “Компиляция боюнча тапшырмалар” МССУ 4410 коштоочу кызмат көрсөтүүлөрдүн белгиленген Эл аралык стандарттарын, ошондой эле көз карандысыздык, объективдүүлүк жана купуялуулук принциптерин жетекчиликке алууга тийиш.
Купуялуулукту сактоо. Эл аралык стандарттардын талаптарынан четтөө, тыянактарды бурмалоо же кесиптик этиканын принциптерин бузуу аудитордук иш жөнүндө мыйзамдарды одоно бузуу катары каралат жана Кыргыз Республикасынын ченемдик укуктук актыларында каралган административдик жоопкерчиликке алып келет.
Финнадзор аудитордук милдеттерди ак ниеттүү жана сапаттуу аткаруу аудитордук кесипке жана жалпысынан финансылык системага болгон ишенимдин негизги фактору экенин эскертет.
