Кыргыз Республикасынын Экономика жана коммерция министрлигине караштуу Финансы рыногун жөнгө салуу жана көзөмөлдөө кызматынын, “Кыргызстан камсыздандыруучулар ассоциациясы” юридикалык жактар бирикмесинин жана камсыздандыруу рыногунун өкүлдөрү 2026-жылдын 8-11-октябрында Түркия Республикасында өткөн негизги эл аралык иш-чараларга катышышты.
Сапардын программасынын алкагында 2026-жылдын 8-октябрында Стамбул финансы борборунда 5-Эл аралык камсыздандыруу саммити, ал эми 2026-жылдын 9-11-октябрында Газиантеп шаарында Түрк дүйнөсү камсыздандыруу биримдигинин 2-Башкы ассамблеясы өттү.
Иш-чаралар интеграциялык процесстерди тереңдетүүгө, кесиптик тилектештикти бекемдөөгө жана түрк мамлекеттеринин камсыздандыруу секторлорунун ортосундагы практикалык кызматташтыкты кеңейтүүгө багытталган. Жолугушуулардын жүрүшүндө катышуучулар ченемдик-укуктук базаны гармонизациялоо, заманбап эл аралык стандарттарды киргизүү, практикалык тажрыйба алмашуу жана биргелешкен кайра камсыздандыруунун натыйжалуу механизмдерин түзүү боюнча актуалдуу маселелерди талкуулашты.
Кыргыз Республикасынын делегациясынын жигердүү катышуусу Түрк дүйнөсүнүн камсыздандыруу биримдигинин жалпы концепциясын ишке ашырууга олуттуу салым кошуп, аймактык интеграциянын контекстинде улуттук камсыздандыруу рыногун мындан ары өнүктүрүү жана бекемдөө үчүн бекем пайдубал түздү.
