Ош шаарында Freedom Broker компаниясы Кыргыз Республикасынын Экономика жана коммерция министрлигине караштуу Финансы рыногун жөнгө салуу жана көзөмөлдөө кызматы (Финкөзөмөл) менен биргеликте калктын финансылык сабаттуулугун жогорулатууга жана инвестициялык маданиятын өнүктүрүүгө багытталган эки билим берүү иш-чарасын өткөрдү.
Иш-чаралардын программасы теориялык билимдерди жана практикалык сабактарды камтып, катышуучуларга фондулук рыноктун иштөө тартиби, инвестициялык инструменттер жана финансылык чечимдерди кабыл алууда эске алынуучу негизги тобокелдиктер жөнүндө түшүнүк алууга мүмкүнчүлүк түздү.
Биринчи күн: «Инвестордун жолу» аттуу мастер-класс
Биринчи күнү жеке финансыларды башкаруунун негиздерине, акцияларга жана облигацияларга инвестиция салуу мүмкүнчүлүктөрүнө, ошондой эле фондулук рыноктогу алгачкы кадамдарга арналган «Инвестордун жолу» аттуу мастер-класс өткөрүлдү.
Freedom Broker Кыргызстан компаниясынын директору Медетбек Назаралиев катышуучуларга ата мекендик фондулук рыноктун өнүгүшү, жеткиликтүү инвестициялык инструменттер жана инвестициялоого жоопкерчиликтүү мамиле жасоо аркылуу жарандар үчүн ачылган мүмкүнчүлүктөр жөнүндө айтып берди.
Финкөзөмөлдүн төрагасынын орун басары Байыш Душебаев куттуктоо сөзү менен чыгып сүйлөдү. Ал өз сөзүндө финансылык рынокту өнүктүрүү, инвесторлордун укуктарын жана мыйзамдуу кызыкчылыктарын коргоо, ошондой эле жарандардын финансылык институттарга болгон ишенимин жогорулатуу жаатындагы мамлекеттик саясаттын артыкчылыктуу багыттарын белгиледи.
Финансылык рыноктун ак ниетсиз жана лицензиясы жок катышуучуларынын ишмердүүлүгүнө каршы күрөшүүгө өзгөчө көңүл бурулду. Акча каражаттарын инвестициялоодон мурда уюмдун укуктук статусун текшерүү, мүмкүн болуучу тобокелдиктерди баалоо жана инвестициялык чечимдерди ишенимдүү маалыматтын негизинде кабыл алуу маанилүү экендиги баса белгиленди.
Ишкердик чөйрөдө коррупцияга каршы маданиятты калыптандыруу, уюмдардын ишмердүүлүгүнүн ачык-айкындуулугун камсыз кылуу жана коррупциялык тобокелдиктердин алдын алуунун натыйжалуу механизмдерин киргизүү маселелерине өзгөчө көңүл бурулду.
Бул контекстте Кыргыз Республикасынын Министрлер Кабинетинин 2026-жылдын 18-сентябрындагы № 626 токтомунун мааниси белгиленди. Аталган токтом менен Кыргыз Республикасынын бизнес-чөйрөсү үчүн иштиктүү этиканын типтүү кодекси жана коррупциялык тобокелдиктерди баалоо жана минималдаштыруу боюнча сунуштамалар бекитилген.
Ошондой эле Экономикалык кызматташтык жана өнүктүрүү уюмунун (ЭКӨУ) корпоративдик башкаруу принциптерин сактоонун маанилүүлүгү баса белгиленди. Бул принциптер экономикалык мамилелердин катышуучуларынын ишмердүүлүгүнүн ачык-айкындуулугун, отчеттуулугун жана жоопкерчилигин жогорулатууга багытталган.
Финкөзөмөл инвесторлордун укуктарын коргоо, финансылык рынокту жөнгө салуу механизмдерин өркүндөтүү, ошондой эле калктын инвестициялоонун мүмкүнчүлүктөрү жана тобокелдиктери тууралуу маалымдуулугун жогорулатуу маселелерине ырааттуу көңүл буруп келет.
Экинчи күн: «Финансылык даам татуу» интерактивдүү оюну
Иш-чаралардын экинчи күнү «Финансылык даам татуу» аттуу практикалык оюн форматында өттү. Катышуучулар интерактивдүү форматта инвестициялык рыноктун иштөө логикасы, финансылык чечимдерди кабыл алуу принциптери жана инвестициялык инструменттерди тандоодо тобокелдиктерди баалоонун мааниси менен таанышууга мүмкүнчүлүк алышты.
Практикалык формат алынган билимдерди бекемдөөгө, инвестициялоого байланыштуу ар кандай кырдаалдарды талкуулоого, ошондой эле эксперттерге кызыктырган суроолорду берүүгө шарт түздү.
Финансылык сабаттуулук — жоопкерчиликтүү чечимдердин негизи
Мындай билим берүү иш-чараларын өткөрүү калктын финансылык сабаттуулугун жогорулатууга, жеке финансыларды башкарууга жоопкерчиликтүү мамилени калыптандырууга жана жарандардын фондулук рыноктун мүмкүнчүлүктөрү жөнүндө билимин кеңейтүүгө өбөлгө түзөт.
Калкка финансылык билим берүү жаатында Финкөзөмөл менен финансылык рыноктун катышуучуларынын кызматташуусу ачык-айкын жана туруктуу инвестициялык чөйрөнү калыптандыруу, финансылык институттарга болгон ишенимди бекемдөө, ошондой эле жарандардын өз укуктарын жана мыйзамдуу кызыкчылыктарын коргоо жолдору жөнүндө маалымдуулугун жогорулатуу үчүн маанилүү.
Мындай демилгелердин негизги максаты — финансылык рынок жөнүндө билимдерди калк үчүн жеткиликтүү кылуу, жарандарга инвестициялык инструменттерди жакшыраак түшүнүүгө көмөктөшүү жана финансылык чечимдерди кылдат таразалап, негиздүү кабыл алууга шарт түзүү.
